OENIPONS seu AENIPONS

OENIPONS, seu AENIPONS

Comitatûs Tirolensis metropolis, vulgo Inspruk, sedes principum, ubi Camera et Parliamentum regionum Austriacarum. Baudrando urbs est ad Oenum satis culta, cum arce splendida, olim Principis sedes, nunc Imperatori subest, 20. milliar. German. a Salisburga, 18. a Tridento. Ad radices Alpium Tridentinarum. Veldidena, antiquitus quibusdam. Hîc Carolus Quintus a Mauritio Saxone, ob socerum Philippum Hassum, praeter fas detentum, bellô petitus, in foedam ac miserabilem fugam coniectus, impedimentis exutus et ad pacem Protestantibus dandam, adactus est, A. C. 1552. Thuan. l. 4. et 7. Alter Oenipons est Oetingen, Simlero; sed ille Aeni legit. Sansoni et Cluv. est vicus Alten Hohenaw, in Bavaria superiore vix 1. leuc. a Wasserburgo, 5. supra Oetingam. 6. a Monachio in Ortum. Hinc nomen lineae Oenipontanae seu Tirolensi, quam orsus Ferdinandus Archidux, fil. secundo genitus Ferdinandi I. Imperatoris cum pater ei Elisabetham Anglicam destinasset, de Maria etiam Scotica Guisii laborarent; ipse Philippinam Welseriam, patriciam Augustanam, sibi iunxit, pater ex ea Caroli Marchionis Burgoviae et Andreae Cardinal. in quibus linea exstincta, A. C. 1618. Eandem iterum incepit Leopoldus (fil posterior Caroli Archiducis Styriae seu Graeciensis lineae conditoris) qui Argentinensis primo et Passaviensis Episcopus; dein eieratô A. C. 1626. Ecclesiasticô statu, Claudiam Mediceam uxorem duxit, defunctus A. C. 1632. His geniti, Clara Isabella Caroli Ducis Mantuae uxor, Maria Leopoldina, Ferdinandus Carolus et Sigismundus Franciscus. Quorum is pater Claudiae Felicitatis, in thalamum Leopoldi Imperatoris accitae; iste Mariae Hedvigis Augustae Palatinae sponsus fuit: uterque sine prole mascula defunctus est. A. C. 1662. et 1665. herede ditionum agnatô Imperatore relictô. Phil. Iac. Spenerus Sylloge Genealogico - Histor. in Familia Austriaca. Vide quoque intra Tirolis.